Serbiýanyň Halk skupşinasynyň (250 orunlyk parlament) deputatlary iki gün dowam eden maslahatdan soň sesleriň köplügi bilen respublikanyň hökümetiniň täze düzümini tassykladylar. Bu barada TASS habar berýär.
“Ses bermäge girişen 225 deputatdan 157 halk deputaty bu teklibi goldady, 68-si garşy boldy, saklanan bolmady, 25 deputat ýokdy. Deputatlaryň aglabasynyň, ýagny 157 deputatyň razy bolandygy sebäpli, parlament hökümeti tassyklady, gutlaýaryn” – diýip, parlamentiň spikeri Wladimir Orliç aýtdy.
Şundan soň Ministrler kabinetiniň täze agzalary kasam kabul etdiler. Serbiýanyň hökümetiniň baştutany häzirki premýer-ministr Ana Brnabiç boldy. Kabinetiň düzümine üç wise-premýer hem girdi: birinji wise-premýer we DIM-iň ýolbaşçysy Iwisa Daçiç, wise-premýer we Goranmak ministri Miloş Wuçewiç, wise-premýer we Maliýe ministri Sinişa Mali.
Şeýle-de, täze hökümetiň düzümine Içeri işler ministri, Içerki we daşary söwda ministri, Oba hojalygy, tokaý baýlyklary we suw baýlyklaryny dolandyryş ministri, Daşky gurşawy goramak ministri, Sport ministri, Medeniýet ministri ýaly beýleki ministrlikleriň hem ýolbaşçylary girdi.
