Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO) ekspertleri syýahatçylaryň uly akymynyň bu etraba ýetirýän zyýanynyň möçberini azaltmak maksady bilen, ýurduň ýaşaýjylary üçin mukaddes hasaplanýan Fudzi dagyna barýan demir ýoluň gurluşygy boýunça ýapon hökümetiniň düzen meýilnamasyny goldadylar. Bu barada sişenbe güni milli jemgyýetçilik telewideniýesi habar berdi.
Onuň berýän maglumatyna görä, şeýle hat ýerli ýolbaşçylara ÝUNESKO-nyň ýanynda hereket edýän Ýadygärlikleri we gözel ýerleri goramak boýunça halkara geňeşden (IKOMOS) gelip gowuşdy. Bu gurama ÝUNESKO-nyň Bütindünýä medeni mirasynyň sanawyna girizmek meýilleşdirilýän desgalaryň ähmiýetine baha bermek bilen meşgullanýar.
Fudzi-ýä ýanaşyk Ýamanasi prefekturasynyň ýolbaşçylygy dagyň eteginden 2,3 müň metr beýiklikde ýerleşen, Bäşinji beket diýip atlandyrylýan ýere eltjek demir ýoluň gurluşygynyň meýilnamasyny işläp taýýarlady. Häzir ol ýere diňe awtoulag trassasy bilen baryp bolýar. Syýahatçylyk möwsüminde ol ýerde tüsseleri bilen daş-töweregi hapalaýan awtoulaglardyr awtobuslardan ýaňa dykynlar döreýär.
