Öňküsi gije Hindistanyň Aýodhýa şäherinde, induslar üçin mukaddes Sarýu (Ghagra) derýasynyň kenarynda bir wagtyň özünde 1,5 milliondan gowrak diýa — pelteli ýagçyra ýakylyp, Ginnesiň rekordlar kitabyna girizilen täze dünýä rekordy goýuldy. Bu barada “The Times of India” gazetine salgylanyp, TASS habar berýär.
19 müňden gowrak meýletinçi tarapyndan 37 ghatda (derýa kenaryndaky daş basgançaklar) 1,576 mln diýa goýlup ýakyldy. Rekord üç günüň içinde taýýarlanyldy. Ginnesiň rekordlar kitabynyň wekilleri azyndan bäş minutlap ýanyp duran çyralary hasaba aldylar. Mundan başga-da, rekordyň kesgitleniş şertiniň talap edişi ýaly, lampadalar birbada 40 minutyň içinde ýakylmalydy. Öňki rekord hem 2021-nji ýylda Aýodhýada goýuldy, şonda mukaddes derýanyň ghatlarynda 940 müňden gowrak diýa ýakyldy.
Induslaryň esasy baýramy bolan Diwaliniň öňüsyrasynda şeýle çyralary ýakmaklyk Aýodhýada eýýäm däbe öwrüldi.
Diýa (dipa hem diýilýär) – Diwali baýramçylygynyň öňüsyrasynda küýzegärler tarapyndan taýýarlanylýan kiçijik pelteli ýagçyralary. Olaryň göwrümi eliň aýasyndan uly däl. Lampadasyz ýekeje öý hem bolmaýar, sebäbi olaryň alawy ýylyň dowamynda obalardan we şäherlerden arwahlary kowýar diýen ynam bar.
