“Red Bull” toparynyň sürüjisi Maks Werstappen 2022-nji ýylyň “Formula-1” dünýä çempionatynyň on dokuzynjy tapgyry bolan ABŞ-nyň Gran-prisinde ýeňiji boldy.
Niderlandly sürüji möwsümde 13-nji ýeňşini gazanyp, Mihael Şumaheriň we Sebastýan Fetteliň rekordyny gaýtalady. Umuman, Werstappeniň Ostiniň ýolundaky ýeňşi karýerasynda 33-nji boldy.
Ikinji orny “Mersedesiň” sürüjisi Lýuis Hemilton eýeledi. Üçünji bolup pellehana gelen 10 orun jerime alan, ýöne ýitgileriň öwezini dolup, “bürünç” gazanmagy başaran “Ferrariden” Şarl Lekler boldy.
Şeýle-de, ilkinji onluga girip, utuk alanlaryň arasynda Serhio Peres (Red Bull), Jorj Rassell (Mersedes), Lando Norris (Maklaren), Fernando Alonso (Alfin), Sebastýan Fettel (Aston Martin), Kewin Magnussen (Haas) we Ýuki Sunoda (Alfa Tauri) bar.
