SpaceX kompaniýasynyň esaslandyryjysy we Tesla kompaniýasynyň eýesi Ilon Mask 2021-nji ýylyň noýabr aýynyň başyndan bäri öz baýlygynyň 35%-ini ýitirdi. Geçen ýylyň noýabr aýynda onuň emlägi 320,3 mlrd dollar bilen bahalandyrylýardy diýip, “Forbes” žurnaly ýazýar. Muny gazeta.ru ýetirýär.
Diňe oktýabr aýynda Mask 28 mlrd dollar ýitirdi. Neşiriň soňky hasaplamalaryna görä, onuň baýlygy 209,4 mlrd dollara barabar. Şeýle-de bolsa, ol dünýäniň iň baý adamlarynyň reýtinginde henizem birinji orny eýeleýär.
Milliarderiň baýlygy Tesla-nyň paýnamalary pese gaçandan soň azaldy. 19-njy oktýabrda kompaniýa üçünji çärýek üçin (iýul – sentýabr) maliýe hasabatyny hödürledi, onuň netijeleri bolsa maýadarlaryň garaşanyndan pes boldy. Tesla 21,5 mlrd dollar girdeji gazanandygyny habar berdi, ýöne analitikler girdejiniň 22 mlrd dollar möçberinde bolmagyny çaklapdylar.
