Braziliýanyň San-Paulu ştatynyň kazyýeti Apple kompaniýasyna ýurtda smartfonlaryny energiýa adapterleri bolmazdan satandygy üçin 19 mln dollar jerime saldy. Bu barada Reuters agentligi habar berýär diýip, incrussia.ru belleýär.
Kazyýetiň karary boýunça, indi kompaniýa Braziliýada iPhone-y zarýad beriji gurluşlar bilen bilelikde satmaly hem-de 2020-nji ýylyň 13-nji oktýabryndan soň iPhone satyn alan ähli braziliýalylara olary bermeli bolýar.
Apple-iň wekilleri kazyýetde kompaniýanyň kömürturşy gazynyň zyňyndylaryny azaltmak üçin iPhone smartfonlaryny adapter bilen bilelikde satmagy bes edendigini düşündirdiler, ýöne kazyýet muňa kompaniýanyň alyjylara zarýad beriji gurluşlary aýratyn satyn aldyrmak üçin “tebigat baradaky aladanyň arkasynda gizlenýändigi” bilen jogap berdi.
Kompaniýa hem bu karary şikaýat etmekçidigini aýtdy.
