Amerikaly boksçy Deonteý Uaýlder Nýu-Ýorkda geçen tutluşygyň birinji raundynda finlýandiýaly pälwan Robert Heleniusy nokauta gidirdi. Başa-baş göreş üç minutdan hem az dowam etdi.
Uaýlder üçin bu göreş britaniýaly türgen Taýson Fýuriden iki gezek ýeňlenden soňky birinji göreş boldy. Ol ilki 2020-nji ýylyň fewralynda aşa agyr agramda Taýsondan WBC-niň titulyny nokaut bilen utdurdy, 2021-nji ýylyň oktýabr aýynda bolsa başa-baş göreş-rewanşda ondan tehniki nokaut bilen ýeňildi.
Göreşden soň amerikaly türgen: "Deonteý Uaýlder gaýdyp geldi" diýdi.
36 ýaşly Uaýlder ringde 43 gezek ýeňdi (42 nokaut bilen), iki gezek ýeňildi we bir göreşi deňme-deň tamamlady (2018-nji ýylda Fýuri bilen). Amerikaly türgen öň 40 ýaşyna çenli çykyşyny dowam etmekçidigini mälim edipdi.
Karýerasynda 31 gezek ýeňiş gazanan (20-si nokaut bilen), 34 ýaşly Helenius dördünji gezek ýeňlişe sezewar boldy.
