Yragyň Wekiller geňeşi (parlament) Abdel Latif Raşidi ýurduň täze prezidenti hökmünde saýlady. Bu barada Yragyň “Rudau” teleýaýlymy habar berdi diýip, TASS belleýär.
Gizlin ses berişligiň ikinji tapgyrynda ol garşydaşy Barham Salehden has köp ses gazandy. Parlamentiň hasaplaýyş komissiýasynyň maglumatlaryna görä, Raşid üçin 162 ses, Saleh üçin 99 ses berildi, 8 býulleteniň güýji ýok diýlip hasap edildi. Şeýlelikde, ses berişligiň ikinji tapgyrynda has köp ses almak bilen, 2003 – 2011-nji ýyllarda Suw baýlyklarynyň ministri wezipesini eýelän Raşid Yrak Respublikasynyň onunjy prezidenti boldy.
Raşidi prezident wezipesine saýlanmagy bilen ilkinjileriň biri bolup ýurduň premýer-ministri Mustafa al-Kazymi gutlady.
Yragyň Konstitusiýasyna laýyklykda, döwlet baştutany ýurduň kürt jemgyýetine, premýer-ministr şaýy musulmanlaryna, parlamentiň başlygy bolsa sünni musulman konfessiýasyna degişli bolmaly. Täze döwlet baştutany saýlanandan soň 15 günüň dowamynda resmi taýdan täze premýer-ministri bellemeli.
