2022-nji ýylyň birinji ýarymynda dünýäde 4,3 million sany elektriki we gibrid (PHEV, ýagny zarýad berilýän) ulag satyldy. Bu 2021-nji ýylyň degişli döwründäkiden 62% köpdür. Şeýle hasabaty ev-volumes.com portaly ýazýar.
Geçen ýyl bilen deňeşdirilende diňe elektrokarlaryň özüniň ýerlenilişiniň möçberi 75%, plagin-gibrid modeliniňki bolsa — 37% artdy. Daşyndan zarýad almaga mümkinçiligi bolmadyk gibrid ulaglaryň satuwy hem artdy (14%), şonda ýumşak gibrid gurluşly awtoulaglaryň satuwy bolsa, tersine, 7% pese gaçdy.
Adaty içinden ot alýan hereketlendirijili ulaglaryňam söwdasy peseldi (16%). Tutuş dünýä boýunça ýylyň birinji ýarymynda ulaglar 8% az ýerlenildi.
Batareýaly modelleriň satuwy boýunça Hytaýyň BYD konserni öňbaşçy boldy. Onuň söwdasy 2021-nji ýylyň birinji ýarymy bilen deňeşdirilende birbada 320% artdy, ýöne barybir doly bahaly elektrokarlaryň arasynda öňdeligi ep-esli öňe saýlanan Tesla eýeleýär.
ev-volumes.com.-yň çaklamasyna görä, tutuş 2022-nji ýylda dünýäde 10,6 million «elektriklijeler» we zarýad berilýän gibridler (degişlilikde 8 we 2,6 million sanysy) satylmaly. Ýylyň ahyryna çenli ulanyşa beriljek batareýaly modelleriň umumy sany 27 milliona ýetmeli, olaryň 70%-i doly elektrikleşdirilen ulag bolar.
