Günorta Koreýanyň Samsung Electronics Co. kompaniýasy üçünji çärýekde operasion girdejisiniň 32% azaljakdygyny çaklaýar diýip, kapital.kz belleýär.
Kompaniýa 30-njy sentýabrda tamamlanan çärýegiň jemi boýunça, operasion girdejisiniň geçen ýylyň degişli döwründäki 15,8 trln wona bilen deňeşdirilende, 10,8 trln wona (7,7 mlrd dollar) bolmagyna garaşýar. Deslapky hasaplamalara görä, girdeji 2,7%, 76 trln wona çenli ýokarlandy.
Şol bir wagtyň özünde, FactSet tarapyndan sorag edilen analitikler kompaniýanyň operasion girdejisiniň 11,9 trln wona möçberinde, girdejiniň 78,2 trln wona möçberinde bolmagyna garaşýarlar.
Şu ýyl Samsung elektronika we ýat çipleri üçin islegiň ýokary bolmagy netijesinde rekord girdejini hasaba aldy. Şeýle-de bolsa, soňky döwürde ýokary inflýasiýanyň we global çökgünlik töwekgelçiliginiň güýjemegi esasynda bu önüme bolan isleg gowşaýar.
Kompaniýanyň operasion görkezijileriniň ýaramazlaşmagynyň beýleki sebäpleriniň arasynda ABŞ-nyň dollarynyň wona görä ýokarlanmagy hem bar. Günorta Koreýanyň walýutasynyň hümmeti ýakynda 13 ýyllyk minimumy täzeledi.
Samsung-yň üçünji çärýek üçin hasabaty 27-nji oktýabrda çap ediler.
