Amerikanyň Google kompaniýasy penşenbe güni geçen tanyşdyryş dabarasynda täze Pixel 7 we Pixel 7 Pro flagman smartfonlaryny, şeýle-de özüniň ilkinji Pixel Watch "akylly" sagatlaryny hödürledi.
Bahasy degişlilikde 599 dollardan we 899 dollardan başlaýan smartfonlarda has ýokary öndürijilikli täze Tensor G2 çipi ulanylýar. Modelleriň ikisi hem aňrybaş energiýa tygşytlaýjy režimde goýlanda zarýad berilmezden 72 sagada çenli işläp bilýär, öňküler diňe 48 sagat işläp bilýärdi.
Pixel Watch, öz gezeginde, Fitbit tehnologiýasy utgaşdyrylan Android operasion ulgamyň esasyndaky "akylly" sagatlaryň birinji modeli bolar diýip, The Wall Street Jounal belleýär.
Täze gajetler dükanlara 13-nji oktýabrda çykar.
Pixel smartfonlary geçginliligi boýunça Apple we Samsung ýaly bazaryň iň hyrydarly öňdebaryjylaryndan düýpli yza galýar. Demirgazyk Amerikanyň bazarynda gurluşyň paýy 2% töweregi hem bolsa, ol kem-kemden artmak bilen. Canalys seljeriş kompaniýasynyň maglumatlaryna görä, Pixel-iň satuwy ýylyň ikinji çärýeginde, geçen ýylyň degişli döwri bilen deňeşdirilende, üç esseden gowrak artypdyr.
