TikTok serwisi Gazagystanda wekilhana açar. Bu barada kompaniýanyň wise-prezidenti Teo Bertram “Digital Bridge” halkara forumynda aýtdy diýip, centralasia.media belleýär.
“Bu ýerde mazmunyň hili diýseň gowy, biz hut Gazagystanyň tutuş sebit üçin merkez bolmagyny isleýäris. Biziň kompaniýamyzda dürli maksatnamalar, mysal üçin, syýahatçylyk boýunça maksatnamalar bar. Bu ýerde tebigat hem ajaýyp, biz ol barada has giňişleýin maglumat bermäge kömek edip bileris. Milli aşhana, däp-dessurlar, gözel ýerler – adamlara ähli zat gyzykly. Bu ýurdy dünýä tanatmagyň täze usulydyr. Biz şeýle taslamalary dürli ugurlarda, şol sanda saglygy goraýyş, bilim we ykdysadyýet ulgamlarynda-da işe girizmegi meýilleşdirýäris. Maksatnama işe goýberilýär we şonuň esasynda mazmun taýýarlanýar” – diýip, Teo Bertram žurnalistlere gürrüň berdi.
Habar berlişi ýaly, wekilhana mazmun döredijilere maslahat berer. Hünärmenler gowy görýän işiňde nähili gazanç etmelidigini we öz wideoňa mahabaty nädip goşmalydygyny öwreder.
