Tailandyň hökümeti şenbe gününden başlap ýurtda koronawirus pandemiýasy sebäpli girizilen adatdan daşary ýagdaý režimini ýatyrdy. Bu barada Royal Thai Government Gazette-de çap edilen kararda aýdylýar diýip, TASS habar berýär.
Ilkibaşda 2020-nji ýylyň mart aýynda girizilen çäklendirme 19 gezek uzaldyldy, ýöne şu ýylyň 23-nji sentýabryndan häkimiýetler Tailandyň pandemiýadan soňky tapgyra geçmeginiň çäklerinde ony ýatyrmak kararyna geldiler. Şonuň bilen birlikde patyşalykdaky koronawirus bilen göreş merkezi aýratyn edara hökmünde işini bes etdi. Onuň wezipeleri Tailandyň Saglygy goraýyş ministrligine geçirildi.
Mundan başga-da, patyşalyga girýänler üçin sanjym şahadatnamasyny ýa-da koronawirus barlagynyň netijelerini görkezmek talaby ýatyryldy.
Ýöne çäklendirmeleriň köpüsiniň ýatyrylandygyna garamazdan, Tailandyň häkimiýetleri adamlaryň köpçülik bolup üýşýän ýerlerinde örtük dakynmagy henizem maslahat berýärler. Ýeňil alamatlar bilen koronawirus ýokuşanlara indi üzňelikde bolmak hökman däl. Şol bir wagtyň özünde, ýokanç keselli bilen ýakyn aragatnaşykda bolan adamlar 10 günüň dowamynda öz saglyk ýagdaýlaryna özbaşdak gözegçilik etmeli.
Ilatynyň sany 69,6 mln adam bolan Tailandda ilkinji koronawirus bilen keselleme hadysasy 2020-nji ýylyň 13-nji ýanwarynda ýüze çykaryldy. Häzirki wagtda patyşalykda kesellänleriň sany 4,68 milliondan geçdi, 4,64 milliondan gowrak adam sagaldy, 32,7 müň hassa aradan çykdy.
