28-nji sentýabrda Prezident Serdar Berdimuhamedow «John-Deere» kompaniýasynyň oba hojalyk we seýilgäh enjamlary bölüminiň ýolbaşçysy Markwart fon Pentsi kabul etdi. Myhman Türkmenistanyň ýurt Garaşsyzlygynyň 31 ýyllygy mynasybetli dabaralara gatnaşmak üçin ýurdumyza geldi.
Söhbetdeşligiň dowamynda işewür döwlet Baştutanyna ozal gazanylan ylalaşyklar bilen baglylykda, alnyp barylýan işler barada habar berdi hem-de kompaniýanyň hyzmatdaşlygy giňeltmegi we Türkmenistana getirýän oba hojalyk tehnikalarynyň, şol sanda ýerli toprak-howa şertlerine laýyk gelýän ekiş we hasyl ýygnaýjy tehnikalaryň görnüşlerini artdyrmagy maksat edinýändigini belledi. Şeýle hem myhman türkmen hünärmenlerini taýýarlamaga, döwrebap tehnika hyzmat edýän işgärleriň hünär derejesini mundan beýläk-de ýokarlandyrmaga ýardam bermäge gyzyklanma bildirýändiklerini tassyklady hem-de kompaniýanyň öňdebaryjy tehnologiýalaryny we işläp taýýarlamalaryny ornaşdyrmak baradaky tekliplerini beýan etdi.
