28-nji sentýabrda Halkara ahalteke atçylyk sport toplumynda mukaddes Garaşsyzlygymyzyň 31 ýyllygy mynasybetli Prezident Serdar Berdimuhamedowyň gatnaşmagynda baýramçylyk at çapyşyklary geçirildi.
Halkara ahalteke atçylyk sport toplumynyň esasy girelgesindäki meýdançada döwlet Baştutanyny Milli Geňeşiň Mejlisiniň Başlygy, Halk Maslahatynyň Başlygynyň orunbasary, Ministrler Kabinetiniň Başlygynyň orunbasarlary, harby we hukuk goraýjy edaralaryň, ýurdumyzda hereket edýän diplomatik wekilhanalaryňdyr halkara guramalaryň ýolbaşçylary, baýramçylyk dabaralaryna gatnaşýan daşary ýurtly myhmanlar garşyladylar.
Ahalteke bedewleriniň çapyşyklarynyň 7-si guraldy. 1600, 1800, 2200 metr aralyga guralan çapyşyklaryň her birine atlaryň 10-sy gatnaşdy.
Ýeňijilere Türkmenistanyň Prezidentiniň adyndan gymmat bahaly baýraklar gowşuryldy.
