27-nji sentýabrda günüň ikinji ýarymynda Türkmenistanyň Garaşsyzlygynyň 31 ýyllygyna bagyşlanan dabaralar «Älem» medeni-dynç alyş merkezinde geçirilen sungat ussatlarynyň konserti bilen dowam etdi.
Oňa Hökümet agzalary, Milli Geňeşiň Halk Maslahatynyň we Mejlisiniň wekilleri, ýurdumyzyň ministrlikleriniň we pudaklaýyn dolandyryş edaralarynyň, Türkmenistanda işleýän diplomatik wekilhanalaryň ýolbaşçylary, jemgyýetçilik guramalarynyň hem-de köpçülikleýin habar beriş serişdeleriniň wekilleri, talyp ýaşlar, şeýle-de daşary ýurtly myhmanlar gatnaşdylar.
Konsertiň beýik watansöýüjilige ýugrulan baýramçylyk çykyşlary Garaşsyzlyk ýyllarynda ýurdumyzyň gazanan üstünliklerini, döredijilik ruhuny şöhratlandyrdy. Dabarada türkmen estradasynyň ýyldyzlary ýerine ýetiren ajaýyp aýdymlary bilen öz ussatlyklaryny görkezdiler. Häzirki zaman köpöwüşginli yşyklandyryş tehnologiýalarynyň ulanylmagy bolsa baýramçylyk konsertiniň aýratyn özboluşlylygyny ýüze çykardy.
Baýramçylyk dabarasy köpöwüşginli feýerwerk bilen tamamlandy.
