Şu ýyl elektromobil satuwy rekord derejä ýetip biler diýip, Halkara energetika agentligi (HEA) çaklaýar. Şonuň bilen birlikde, ol 2050-nji ýyla çenli zyňyndylaryň nol derejesini gazanmak boýunça maksatlara ýetmek üçin beýleki pudaklarda-da has işjeň çäreleri görmegiň zerurdygyny belleýär. Muny interfax.ru ýetirýär.
HEA-nyň ýyllyk “Tracking Clean Energy Progress (TCEP)” hasabatynda 2021-nji ýylda global elektromobil satuwynyň iki esse ýokarlanandygy we munuň tutuş awtomobil bazarynyň, takmynan, 9%-ine barabardygy aýdylýar. 2022-nji ýylda bolsa satuwyň ýeňil awtomobilleriň umumy satuwynyň 13%-ini eýeläp, rekord derejä ýetmegine garaşylýar.
Öň, HEA 2021-nji ýylda elektromobil satuwynyň 6,6 milliona ýetendigini habar berdi. 2022-nji ýylyň birinji çärýeginde görkeziji 2021-nji ýylyň ilkinji üç aýy bilen deňeşdirilende 75% ýokarlanyp, 2 milliona barabar boldy.
HEA-nyň maglumatlaryna görä, elektromobil öndürijileriniň 2050-nji ýyla çenli zyňyndylaryň nol derejesini gazanmak boýunça meýilnamanyň çäklerinde 2030-njy ýyl üçin öňde goýlan maksatlara ýetmäge ähli mümkinçilikleri bar.
Şol bir wagtyň özünde agentlik elektromobil satuwy bilen bagly ýagdaýyň heniz “global hadysa” däldigini belleýär.
“Ösüp barýan ýurtlarda satuw satyn alşyň bahasynyň ýokarlanmagy we elektromobillere zarýad bermek üçin infrastrukturanyň ýetmezçilik etmegi bilen baglylykda has ýuwaş depginler bilen alnyp barylýar” – diýip, agentlik belleýär.
