Prezident Serdar Berdimuhamedow «Türkmenistanda ýaş maşgalalaryň ýaşaýyş-durmuş şertlerini has-da gowulandyrmak hakyndaky» Karara gol çekdi. Bu barada Hökümet mejlisiniň barşynda bellenildi diýip, «Watan» habarlar gepleşiginde habar berildi.
Resminama laýyklykda, resmi taýdan nikalaşyp, durmuş guran ýaş maşgalalara zerur bolan öý goşlaryny we hojalyk harytlaryny satyn almak üçin girew goýmazdan zamunlyk esasynda ýyllyk 1 göterim bilen 3 ýyl möhlete berilýän karzyň möçberi 20 müň manada çenli ýokarlandyryldy.
Merkezi bank Adalat ministrligi bilen bilelikde şu Karardan gelip çykýan üýtgetmeleri we goşmaçalary Türkmenistanyň kanunçylygyna girizmek barada teklipleri bir aý möhletde taýýarlap, ony Ministrler Kabinetiniň garamagyna berer.
Bellenilişi ýaly, bu resminama bu ugurdaky işleriň ýagdaýyna geçirilen seljermelere laýyklykda, şeýle hem ýurdumyzda zähmet haklarynyň, pensiýalaryň we döwlet kömek pullarynyň her ýyl yzygiderli artdyrylýandygy göz öňünde tutulyp taýýarlanyldy.
Bu resminamanyň ýaş maşgalalara durmuş goldawyny bermekde möhüm ähmiýetiniň bardygyny belläp, Prezident Serdar Berdimuhamedow resminama laýyklykda ýaş maşgalalara ýyllyk 1 göterimli 3 ýyllyk möhlet bilen 20 müň manat karz serişdeleriniň beriljekdigini aýtdy.
