Şu gün, 20-nji sentýabrda Aşgabadyň Demir ýol menziline «Demirýollary» açyk görnüşli paýdarlar jemgyýeti tarapyndan Hytaýyň CRRC Ziyang CO., LTD. kompaniýasyndan satyn alnan 15 sany ýokary kuwwatlygy bolan täze ýük teplowozynyň ikisi gelip gowuşdy.
Galanlary 2023-nji ýylyň ýanwar aýynyň ahyryna çenli Türkmenistana tapgyrlaýyn getiriler diýip, ORIENT agentligi habar berýär.
Lokomotiwleriň her biri biri-birine seplenen iki wagondan ybarat. Kuwwatly dizel hereketlendirijileri oturdylan teplowozlar tizligini 100 km/sag-a çenli artdyryp we ýükleriň örän uly möçberini daşap bilýär. Täze lokomotiwleriň kuwwaty, Türkmenistanda öňki ulanylyp ýörlenler bilen deňeşdirilende, 1600 kWt ýokarydyr.
Şeýle hem, üstümizdäki ýylyň noýabrynda ýurdumyza Brýanskiniň maşyngurluşyk zawodynda öndürilen, häsiýetnamasy boýunça şu teplowozlara meňzeş ýene bäş teplowoz geler.
Täze dizel teplowozlary Türkmenistanyň ulag kuwwatyny ýokarlandyrmaga, içerki we üstaşyr ýükleriň daşalyşynyň möçberlerini, şeýle hem olaryň ulagly daşalyşynyň tizligini artdyrmaklyga ýardam eder.
