17-nji sentýabr Milli Geňeşiň Halk Maslahatynyň Başlygy Gurbanguly Berdimuhamedow Halkara Ahalteke atçylyk sport toplumyna baryp göreninden soň, Ahal welaýatynyň täze, döwrebap edara ediş merkeziniň on müň tomaşaçy orunlyk stadionyna bardy we bu ýerde gurulýan desgalaryň taslamalary, olaryň ýerleşjek ýerleriniň çyzgylary hem-de gurluşykda ulanylýan serişdeleriň aýratynlyklary bilen tanyşdy.
Ahal welaýatynyň merkeziniň gurluşygy boýunça döwlet komitetiniň başlygy D.Orazow we Ahal welaýatynyň täze, döwrebap edara ediş merkeziniň şäheriniň häkimi Ş.Durdylyýew bu ýerde görkezilýän şekil taslamalary barada giňişleýin maglumatlary berdiler.
Gurbanguly Berdimuhamedow stadionyň futbol oýnamak üçin niýetlenen meýdançasynyň derejesi, onuň enjamlaşdyrylyş babatda ýokary halkara ülňülerine laýyk gelşi bilen gyzyklanyp, stadionyň ähli görkezijiler babatda ugurdaş düzümlere bildirilýän talaplara doly laýyk gelmelidigine ünsi çekdi.
Milli Geňeşiň Halk Maslahatynyň Başlygy stadionyň çäginde döredilýän şertler onuň enjamlaşdyrylyşy bilen tanyşlygyň dowamynda toplumyň trenažor zalyna baryp gördi.
Gurbanguly Berdimuhamedow bölümiň enjamlarynda birnäçe maşklary ýerine ýetirdi we olaryň köpüsiniň dürli ýaşlardaky adamlary, aýratynda çapyksuwarlar we atbakarlar üçin ähmiýetlidigini belledi.
Soňra Milli Geňeşiň Halk Maslahatynyň Başlygyna stadionyň daşynda merkeziň Akhan şaýolunyň ugrunda oturdyljak yşyklandyryş ulgamyna degişli sütünleriň görnüşleri görkezildi.
