13-nji sentýabrda Döwlet medeniýet merkeziniň Mukamlar köşgünde Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň çäklerinde ilkinji gezek geçirilýän «Çalsana, bagşy!» bäsleşiginiň jemleýji tapgyry boldy.
«Çalsana, bagşy!» bäsleşiginiň jemleýji tapgyryna Aşgabat şäherinden we ýurdumyzyň welaýatlaryndan bagşylaryň hem-de sazandalaryň 12-si gatnaşdy. Şolaryň hatarynda gyzlaryň 4-siniň bardygyny bellemeli.
Dabara gatnaşanlaryň şowhunly el çarpyşmalary bilen ýeňiji bolan bagşylaryň hem-de sazandalaryň atlary yglan edildi we olara degişli diplomlar hem-de gymmatly bahaly sowgat gowşuryldy.
Şeýle hem “Çalsana, bagşy!” bäsleşiginiň jemleýji tapgyryna gatnaşanlaryň hemmesine hormatly Prezidentimiziň adyndan ýadygärlik sowgatlary gowşuryldy.
Türkmenistanyň Medeniýet ministrligi bagşy-sazandalaryň arasyndaky bu döredijilik bäsleşigini ýokary derejede gurady. Bäsleşigiň şertlerine laýylykda, 18-35 ýaş aralygyndaky ýaşlar bäsleşige gatnaşyp bilýärler.
Belläp geçsek, bu bäsleşik milli mirasymyzy öwrenmek, wagyz etmek maksady bilen, şeýle hem dutar ýasamak senetçiliginiň, dutarda saz çalmak we bagşyçylyk sungatynyň ÝUNESKO-nyň Adamzadyň maddy däl, medeni mirasynyň görnükli nusgalarynyň sanawyna girizilmeginiň hormatyna şu ýylyň ýanwar aýynda esaslandyryldy.
