Google YouTube platformasyna okatmak bilen bagly täze funksiýany goşmak isleýär. Şonuň ýaly-da, kontentiň awtorlary üçinem täze mümkinçiligiň dörejekdigi barada aýdylýar.
Entek munuň ady ýok, ýöne hemme zat diýseň ýönekeý: YouTube-de tölegli okuw kurslaryny ýerleşdirmäge mümkinçilik dörär. Ýagny, şeýle kurslaryň awtorlary, kursuň haýsy ugra degişlidigine garamazdan, diňe YouTube-dan peýdalanyp bilerler, indi olara öz okuwçylaryny beýleki platformalara ýa-da saýtlara ýaňadan ugrukdyrmak gerek bolmaz, çünki bu kurslaryň tölegini gönüden-göni YouTube-yň özünde amala aşyryp bolar.
Tölegli kurslaryň bölegi bolup durjak wideolarda Google-yň mahabaty bolmaz we olary fon režiminde diňläp bolar. Agzalan ýagdaýda gürrüň YouTube Premium-a ýazylmazdan, kurslaryň biriniň tölegini tölänlere degişlidir.
Täze hyzmatyň çäginde «wiktorinalar» (Quizzes) diýen goşmaça funksiýa peýda bolar. Kurslaryň awtorlary öz müşderileri üçin şeýle wiktorinalary döredip bilerler, bu okuw işini dürlüçe guramaga mümkinçilik berer.
Ilkibaşda täze hyzmat beta-wersiýa görnüşinde ABŞ-da we Günorta Koreýada indiki ýyl peýda bolar. Şeýle-de, awtorlaryň isleg bildirýänlere tölegsiz kurslary hem hödürläp biljekdiklerini bellemelidiris.
