Prezident Serdar Berdimuhamedowyň adyna Pakistan Yslam Respublikasynyň ýolbaşçylarynyň ― Prezident Arif Alwiniň hem-de Premýer-ministr Muhammad Şahbaz Şarifiň adyndan hoşallyk hatlary gelip gowuşdy. Olarda türkmen döwletiniň Baştutanyna Pakistanyň Garaşsyzlyk güni mynasybetli iberen gutlag hatlary üçin hoşallyk bildirilýär.
“Siziň şol mähirli sözleriňiz doganlyk ýurtlarymyzyň arasyndaky barha berkeýän dostlukly gatnaşyklary beýan edýär. Biziň döwletlerimiziň arasyndaky hyzmatdaşlygyň we özara goldaw bermegiň mundan beýläk-de pugtalanjakdygyna ynanýaryn” diýlip, Prezident Arif Alwiniň hatynda bellenilýär.
Premýer-ministr Muhammad Şahbaz Şarif hem, öz gezeginde, Pakistanyň Garaşsyzlyk güni mynasybetli iberilen gutlag haty üçin hoşallyk bildirip: “Pakistan bilen Türkmenistanyň arasyndaky dostlukly gatnaşyklar köpasyrlyk taryhy, ruhy we medeni umumylyga esaslanýar. Pakistan Türkmenistan bilen ýakyn gatnaşyklara ýokary baha berýär. Özara hormat goýmaga, dostluga hem-de hyzmatdaşlyga daýanýan bu gatnaşyklaryň has-da pugtalandyryljakdygyna ynanýaryn” diýip nygtady.
