Britan tagtynyň mirasdüşeri, Uels şazadasy Çarlz şa aýaly Ýelizaweta II aradan çykandan soň Beýik Britaniýanyň täze patyşasy boldy. Bukingem köşgüniň metbugat gullugynda patyşanyň bu gije Balmoral galasynda galyp, ertir Londona dolanjakdygy nygtaldy. Bu barada rbc.ru habar berýär.
“The Guardian-yň” habaryna görä, täç geýdirmek dabarasy gysga wagtda Londondaky Sent-Jeýms köşgünde geçiriler.
Şazada Çarlz 1948-nji ýylyň 14-nji noýabrynda Londonda dünýä indi (73 ýaş). Ol üç ýyl üç aý ýaşynda Georg VI aradan çykandan we Ýelizaweta II tagta geçenden soň britan tagtynyň mirasdüşeri boldy. Ol ýetmiş ýyl tagtdaky nobatyna garaşdy – bu britan monarhiýasynyň taryhynda iň uzak möhletdir.
Çarlzyň iki çagasy bar – şazada Uilýam we şazada Garri. Ol 1997-nji ýylda awtoulag heläkçiliginde şa zenany Diana aradan çykandan sekiz ýyl soň Kamilla Parker Boulza öýlendi.
Ýelizaweta II-niň ýagdaýy şu ýyl hasam ýaramazlaşdy. Fewral aýynda ol koronawirus bilen keselläp, hereket etmegiň kyndygyny aýtdy. Ol geçen ýylyň oktýabr aýyndan mart aýyna çenli çykyş çärelerine gatnaşmady, iýun aýynda bolsa tas 70 ýylyň içinde ilkinji gezek Askotdaky at çapyşygyny sypdyrdy. Şondan soň Bukingem köşgi on ýylyň içinde ilkinji gezek şa aýalynyň borçlarynyň sanawyny üýtgedip, olaryň bir bölegini şazada Çarlza geçirdi.
