Lotereýada 110 funt sterling (126,5 mln dollar) möçberinde pul baýragyny utan adam çarşenbe güni özüniň utuşyny mälim etdi. Bu barada Sky News teleýaýlymy habar berdi.
Teleýaýlymyň habar bermegine görä, adyny agzamakdan saklanan adam EuroMillions lotereýasynyň, içinde iki sany nesibeli belgi bolan, ýedi sanyny bilmegi başaran biletini görkezdi. Hereket edýän düzgüne görä, utuş tassyklanyp, degişli pul tölenenden soň, ýeňiji adynyň agzalmagyna ýa-da agzalmazlygyna razylyk berýär. Eger ol özi barada maglumat berilmegini islemese, onda biletiň ýurduň haýsy böleginde satyn alnandygy baradaky habar metbugatda çap edilmeýär.
Sky News-yň hasaplamalaryna görä, Beýik Britaniýada jemi 15 adam EuroMillions-dan 100 mln funt sterlingden geçirip pul utupdyr. Birleşen Patyşalygyň ýaşaýjysy 195 mln funt sterling (şol wagtyň kursuna görä, 234,5 mln dollar) utandan soň, şu rekord bellige alnypdyr. Şondan iki aý öň Angliýanyň günorta-günbatarynda ýerleşen Glosterşir graflygynda ýaşaýan är-aýal 184,3 mln funt sterling (227 mln dollar) utupdyr.
EuroMillion lotereýasy Ýewropada 2004-nji ýyldan bäri geçirilýär. Ilkibadalar ol Beýik Britaniýada, Ispaniýada we Fransiýada geçýärdi, soňra oňa Awstriýa, Belgiýa, Irlandiýa, Lihtenşteýn, Lýuksemburg, Portugaliýa we Şweýsariýa hem goşuldylar. Lotereýanyň düzgünine görä, ýeňijiniň adyny agzatmazlyga-da haky bar. Ýewropalylaryň köpüsi şeýle hem edýär. Meselem, iýul aýyndaky iň uly utuşyň eýesi öz adyny köpçülige mälim edip durmady.
