Uçar heläkçilige uçran ýagdaýynda adam dinamiki güýje kän sezewar bolmaýan ýerlerde otursa, aman galmak mümkinçiligi ýokarlanýar diýip, awiasiýa inženeri, konstruktor Wiktor Prýadka gürrüň berdi. Muny Day.Az ýetirýär.
Bilermen howa peteklerini uçaryň salonynyň guýruk bölüminde ýerleşýän orunlar üçin satyn almagy maslahat berýär. Mejbury gonuşda we uçuş wagty adatdan daşary hadysa ýüze çykanda howa gämisiniň bu bölegine düşýän dinamiki güýç pes bolýar.
Inženeriň aýtmagyna görä, dar göwrümli guýruk bölegi uçuşlar üçin iň howpsuz ýerdir. Adatdan daşary ýagdaý ýüze çykanda giň göwrümli bortlaryň gurluşy çalt bozulýar – şeýle uçarlaryň ýolagçylarynyň aman galmak ähtimallygy pes bolýar.
“Dar göwrümli uçarlaryň guýrugynda oturmagy şertli ýagdaýda howpsuz hasap etmek bolar. Ol ýerde soňky hatarda orunlaryň ýerleşişi 3+3 ýa-ha 3+2, ýa-da 2+2 görnüşinde” – diýip, bilermen belledi.
Prýadka giň göwrümli uçarlarda orunlaryň ýerleşişiniň 3+4+3 görnüşindedigini sözüniň üstüne goşdy. Ol ýerde uçaryň göwrüminiň diametri uly we gurluşyň bozulmagy çalt bolup geçer, şonuň üçin şeýle uçarda heläkçilik bolanda diri galmak ähtimallygy peselýär.
