Iýul aýynda Toyota Motor Corp. 706 547 awtomobil öndürdi, bu bolsa 2021-nji ýylyň iýul aýyna garanyňda, 8,6% azdyr. Korporasiýanyň önümçiligi eýýäm dört aý bäri maksatly derejeden pes bolýar. Bu barada interfax.ru habar berýär.
Aprel aýynda başlan häzirki maliýe ýylynyň ilkinji dört aýynda Toyota meýilleşdirilenden 10,3% az awtomobil çykardy.
Kompaniýa önümçiligiň peselmegini ýarym geçiriji bölekleriň ýetmezçilik etmegi, Aziýada koronawirusyň ýaýramagy sebäpli zawodlaryň işiniň togtadylmagy, agyr howa şertleri we awtomobilleriň birnäçe tapgyrynyň yzyna gaýtarylmagy bilen baglanyşdyrýar.
Iýul aýynda Toyota ulaglarynyň önümçiligi daşary ýurtdaky zawodlarda 4,5% ýokarlanyp, Ýewropada, Hytaýda we Aziýada görkezijileriň ýokarlanmagy netijesinde 484 730-a ýetdi. Ýaponiýadaky zawodlarda awtomobil önümçiligi 28,2% pese gaçdy.
Kompaniýa noýabr aýyna çenli önümçiligi artdyrmagy meýilleşdirýändigini habar berýär. Ol sentýabr aýynda 850 müň awtomobil öndürmegi meýilleşdirýär, bu hem bu aý üçin rekord bolar. Şeýle-de, Toyota ýyl üçin önümçiligiň maksatly görkezijisini 9,7 mln awtomobil derejesinde saklaýar.
