Amerikanyň giperkar öndürýän Hennessey Special Vehicles kompaniýasy modeliň dünýä möçberindäki debýutynyň öňüsyrasynda Kaliforniýada Venom F5 rodsteri bilen tanyşdyrdy. Öndüriji öz resmi saýtynda Venom F5-iň 2021-nji ýylda görkezilen Venom F5 Coupe modeliniň logiki dowamy hasaplanýandygyny belledi.
Kuwwaty 1817 a.g.-ne deň bolan goşa turboüfleýjili Hennessey V5 hereketlendirijisi Venom F5-i herekete getirýär. Art herekete getirijili rodster geçirijiniň awtomat korobkasy bilen enjamlaşdyrylan. Giperkar sagatda 300 mile çenli (482 km/s) tizligini artdyrmaga ukyply.
Giperkaryň esasy göze ilýän bölegi onuň üçegidir. F5-iň kupesinden tapawutlylykda, ol gaty kompozit uglerod süýmünden taýýarlanandyr. Ulagyň tizligini artdyryş mümkinçiligine, şeýle hem iň ýokary tizliklerde aerodinamiki güýçlere üstünlikli garşy durmak üçin onuň üçegi dört sany tiz aýryp bolýan boltlar we juda berk goşa kilt bilen berkidilýär.
Modeliň beýleki bir özboluşly aýratynlygy hereketlendirijiniň seredilýän äpişgesinde gizlenýär, ol çydamly aýnadan ýasalandyr. Motoryň yzky gapagynyň merkezinde ýerleşen bu panel Fury V8 hereketlendirijisini synlamaga mümkinçilik berýär.
Venom F5 rodsteri 30 sanyjak az nusgalykda Tehasda öndüriler. Giperkar 2022-nji ýylyň ahyrynda öndürilip başlanar. Hennessey Special Vehicles kompaniýasy täze Venom F5 rodsterine 3 mln dollar nyrh kesdi.
