Hytaýyň Baidu kompaniýasy hiç hili sürüjisiz ilkinji taksileri işe goýberdi. Olar Çunsin we Uhan şäherlerinde işläp başladylar.
Baidu ozal sürüjisiz ulaglary Hytaýyň dürli sebitlerinde synagdan geçirdi. Ýöne düzgün boýunça ulagda hemişe sürüji-ekspert oturmaly edilipdi. Ol ulagyň hereketine gözegçilik edip, zerurlyk ýüze çykanda dolandyryşy öz eline almalydy.
Häzir gürrüňi edilýän bolsa, sürüjisiz ulaglarda ilkinji kommersiýa daşaýyşlarynyň amala aşyrylyp başlanandygy baradadyr.
Hiç hili sürüjisiz ulagda gitmegiň bahasy 16 ýuan, ýene üstüne her geçilen kilometr üçin 2,8 ýuan tölemeli. Şol bir wagtda Baidu kompaniýasy ilkinji müşderilerine 90% arzanlaşyk hödürleýär. Häzirki wagtda Uhan we Çunsin şäherlerinde bary-ýogy 10 robot taksi işleýär. Olaram ýolagçylary gündizine diňe belli çäk aralygynda daşaýarlar. Taslamanyň ösüşine laýyklykda ulagyň sany kem-kemden artdyrylar.
