Türkmenistan Özbegistanyň çäginde arassa ganly sport atlaryny kemala getirmäge we köpeltmäge gönükdirilen bilelikdäki ylmy taslamany işläp taýýarlamaga gatnaşar. Bu barada Özbegistanyň oba hojalyk ministriniň orunbasary Gahryman Ýuldaşewiň ýolbaşçylygyndaky özbek wekiliýetiniň golaýda Türkmenistana amala aşyran iş saparynyň çäklerinde degişli ylalaşyk gazanyldy.
ORIENT neşiriniň berýän habaryna görä, özbek wekiliýetiniň saparynyň çäklerinde "Türkmen atlary" döwlet birleşiginiň we Halkara ahalteke atçylyk assosiasiýasynyň wekilleri bilen gepleşikler geçirilip, Özbegistanda atçylygy ösdürmek bilen bagly meseleler ara alnyp maslahatlaşyldy. Gepleşikleriň dowamynda Özbegistanyň çäginde arassa ganly sport atlaryny kemala getirmäge we köpeltmäge gönükdirilen bilelikdäki ylmy taslamany işläp taýýarlamak boýunça ylalaşyk gazanyldy.
