15-16-njy awgustda Türkmenbaşy şäherinde Birleşen Milletler Guramasynyň howandarlygynda Türkmenistanyň başlangyjy bilen geçiriljek deňze çykalgasy bolmadyk ösüp barýan ýurtlaryň ulag maslahatyna 30-dan gowrak döwletiň wekiliýetleri, şeýle hem 30-dan gowrak halkara we ýöriteleşdirilen guramalaryň ýolbaşçylary gatnaşarlar. Bu barada TDIM-niň Metbugat gullugy habar berýär.
Bellenilişi ýaly, şeýle-de Birleşen Milletler Guramasynyň, Ýewropada Howpsuzlyk we Hyzmatdaşlyk Guramasynyň, Ykdysady Hyzmatdaşlyk Guramasynyň, Bütindünýä Gümrük Guramasynyň, Halkara Awtoulag Birleşiginiň, Halkara elektrik aragatnaşyk birleşiginiň, TRASEKA we ş.m., birnäçe bank we maliýe guramalarynyň ýolbaşçylary foruma gatnaşýandyklaryny tassykladylar.
Türkmenbaşy şäherinde geçiriljek forum 2024-nji ýylda meýilleşdirilýän BMG-niň Deňze çykalgasy bolmadyk ösüp barýan ýurtlar boýunça üçünji maslahatyna taýýarlyk görmegiň esasy tapgyrlarynyň biridir.
