Ýaponiýanyň Toyota Motor Corp awtomobil öndürijisi häzirki maliýe ýylynyň birinji çärýeginde arassa girdejisini 18% azaltdy, bu bolsa bazar çaklamasyndan hem ýaramazdyr. Şeýle-de bolsa, girdejiniň ösüşi analitikleriň çaklaýşyndan ýokary boldy diýip, interfax.ru habar berýär.
Kompaniýanyň metbugat relizinde bellenilişi ýaly, aprel – iýun aýlarynda arassa girdeji bir ýyl ozalky 897,8 mlrd ýena bilen deňeşdirilende 736,82 mlrd ýena ($5,5 mlrd) boldy. Hünärmenler bu görkezijiniň 756,8 mlrd ýena möçberinde bolmagyna garaşypdylar.
Toyota-nyň çärýek girdejisi 7% ýokarlanyp, 8,49 trln ýena ýetdi. Bu görkeziji hünärmenler tarapyndan çaklanan 8,17 trln ýenadan ýokary boldy.
Operasion girdeji 42%, 578,66 mlrd ýena çenli azaldy. Ýaponiýada operasion girdeji üçden birine, 337,6 mlrd ýena çenli, Demirgazyk Amerikada iki esseden gowrak, 88 mlrd ýena çenli, Ýewropada dörtden birine, 23,6 mlrd ýena çenli azaldy. Aziýada kompaniýa operason girdejisini 15%, 192,2 mlrd ýena çenli ýokarlandyryp bildi.
Geçen çärýek Toyota awtomobilleriniň satuwy bir ýyl ozalky 2,76 mln awtomobilden 2,54 mln awtomobile çenli azaldy.
Toyota häzirki maliýe ýylynda arassa girdejiniň 17%, 2,36 trln ýena çenli azalmagyna we girdejiniň 9,9%, 34,5 trln ýena çenli ýokarlanmagyna garaşýar. Bu döwürde kompaniýa 10,7 mln awtomobil satmagy göz öňünde tutýar.
Toyota-nyň paýnamalary penşenbe güni tas 3% arzanlady. Soňky üç aýda kompaniýanyň bazar kapitallaşdyrmasy 6,1% azalyp, 29,84 trln ýena boldy.
