Dünýäniň iň gür ilatly ýurdunda dogluşy höweslendirmäge gönükdirilen bir çagaly bolmak syýasatynyň ýatyrylandygyna garamazdan, 2025-nji ýylda Hytaýyň ilaty azalyp başlar diýip, saglygy goraýyş ministrligi mälim edýär.
Aziýanyň bu ýurdy tiz garraýan işçi güýjüniň demografik çökgünligi, ykdysady taýdan pese düşme we soňky on ýylyň içinde ýurtda ilatyň ösüşiniň juda peselmegi bilen ýüzbe-ýüz bolýar.
Geçen ýyl dogluşyň derejesi taryhy minimuma baryp ýetdi we bu tendensiýa saklanar.
"Ilatyň ösüşiniň depgini ep-esli haýallady. Ol 14-nji bäşýyllygyň (2021-2025-nji ýyllar) dowamynda ösüşiň otrisatel döwrüne girer" - diýip, duşenbe güni saglygy goraýyş ministrligi hasabatynda duýdurdy.
Soňky ýyllarda Hytaý dogluşa gözegçilik etmek syýasatyny gowşatdy. 2016-njy ýylda ol jübütlere iki çaga, geçen ýyldan başlap bolsa üç çaga edinmäge rugsat berdi. Ýöne bu çözgütler dogluş babatynda üýtgeşik öňegidişlik döretmedi. Jübütleri durmuşyň, ýaşaýyş jaýlarynyň, aýratynam, çagalara bilim bermegiň barha gymmatlaýandygy ýaýdandyrýar.
Resmi maglumatlara laýyklykda, 2021-nji ýylda Hytaýda 10,62 million dogluş hasaba alyndy, bu 1978-nji ýyldan bäri iň pes görkeziji hasaplanýar.
