Amerikan kompaniýasy Joby Aviation Beýik Britaniýada özüniň uçýan taksisini sertifikatlaşdyrmak üçin arza tabşyrdy. Bu barada kompaniýa öz saýtynda habar berdi diýip, TASS belleýär.
“Kaliforniýada ýerleşýän Joby Aviation Beýik Britaniýada özüniň rewolýusion önüminiň sertifikatlaşdyrylmagy üçin arza tabşyrandygy barada mälim etdi. Häzirki wagtda kompaniýa ABŞ-nyň Federal awiasiýa edarasynda (FAA) görnüşi sertifikatlaşdyrmakdan geçýär we amerikan bazarynyň onuň üçin birinji boljakdygyny çaklaýar. Şeýle-de bolsa, FAA-nyň sertifikaty bir wagtda Beýik Britaniýanyň Raýat awiasiýasynyň edarasy tarapyndan hem tassyklanyp bilner, bu hem startapyň britan bazaryna çykyşyny çaltlandyrar. Şeýlelik bilen, Joby Aviation amerikan sertifikatyny daşary ýurtda tassyklatmak üçin ýüz tutan eVTOL (Electric Vertical Take-off and Landing) elektrik hereketlendirijisi bilen dik uçuş we gonuş enjamyny ilkinji işläp düzüji bolar” – diýlip, beýannamada aýdylýar.
Kompaniýa 10 ýyl bäri bäş orunlyk elektrik aerotaksini döretmegiň üstünde işleýändigini belledi. Onuň iň ýokary tizligi – 200 km/sag, uçuş aralygy – 150 km töweregi. Enjam alty elektrik hereketlendirijide işleýär, dik uçuş we gonuş bolsa oňa islendik ýerde işlemäge mümkinçilik berýär.
“ABŞ-nyň we Beýik Britaniýanyň sertifikatlaşdyrma ugrunda hyzmatdaşlygy bu ýurtlara möhüm täze tehnologiýany ilkinji bolup almaga mümkinçilik berer. Bizi howa gatnawlarynyň potensialy ruhlandyrýar. Bu Beýik Britaniýada ekologiýa taýdan arassa we elýeterli sebitleýin gatnawyň bir usuly” – diýip, Joby Aviation-yň esaslandyryjysy we baş müdiri Joben Bewirt belleýär.
