Yssy howa «demir atymyza» ýaramaz täsirini ýetirip biler. Moskwanyň Awtoulag-ýol döwlet tehniki uniwersitetiniň (MADI) "Awtomobil ulagynyň ekspluatasiýasy we awtohyzmat" kafedrasynyň dosenti Lew Zimanowyň sözlerine görä, 30 dereje yssy howada ulagy nädogry ulanmak hereketlendirijini hatardan çykaryp biler diýip, Sputnik radiosy habar berýär.
Elbetde, ulaglar ýasalanda olar dürli howa şertlerinde işlemäge ýaramly edilip döredilýär. Şol sanda ýokary temperatura hem çydamly bolýar. Ýöne, mysal üçin, onuň sowadyş ulgamynda näsazlyk bar bolsa, onda yssynyň täsiri bilen çynlakaý kynçylyklaryň ýüze çykmagy mümkin.
"Häzirki zamanyň ulag serişdeleri dürli temperatura uýgun edilip goýberilýär. Esasy zat, olaryň sowadyş ulgamynyň saz işlemegini gözden salmaly däl. Tomsuň başynda ulagyň radiatorynyň tozgadan, tos-tozandan ýaňa dykyn almagy mümkin, şonda sowadyjy suwuklyk aşa gyzyp, hatda gaýnabam bilýär. Şol gaýnap durşuna-da, hereketlendirijini sandan çykarýar" - diýip, Lew Zimanow belleýär.
Şeýle-de, ol ulagy gaty sürmegi, aýratynam yssy howada ýokary tizlikde sürmegi maslahat bermeýär. Şonuň ýaly ýagdaýlarda ýagyň şepbeşikligi peselýär, bu bolsa hereketlendirijiniň tiz sandan çykmagyna getirýär.
