Türkmenistanyň Daşary işler ministrligi soňky günlerde Özbegistan Respublikasynyň Garagalpagystan Respublikasynda bolup geçýän wakalara alada bilen seredýändigi barada habar berdi.
«Türkmen tarapy Özbegistan Respublikasynyň ýolbaşçylygynyň ýurtdaky konstitusion tertibiniň we kanunyň goralmagy, şeýle hem ýaşaýjylaryň howpsuzlygyny we asudalygyny goramak üçin öz wagtynda we aýgytly hereketlerini goldaýar.
Halkyň köpasyrlyk paýhasy, tejribesi we öňdengörüjiligi ýaly häsiýetleri ýüze çykýan ähli meseleleri we kynçylyklary ýeňip geçjekdigine, şeýle hem Özbegistan Respublikasynyň döwlet we jemgyýet institutlarynyň durnukly ösüşini üpjün etjekdigine berk ynanýarys.
Türkmenistan Özbegistanyň ýakyn goňşusy hökmünde, bu ýurt bilen doganlyk, dostluk we ýakyn hyzmatdaşlyk gatnaşyklary bilen baglanandygy üçin, zerur bolan goldawy we ýardamy bermäge özüniň taýýardygyny mälim edýär» - diýip, Türkmenistanyň DIM-niň Metbugat gullugy belleýär.
Özbegistanyň Konstitusiýasyna üýtgetmeleriň taslamasy zerarly 1-nji iýulda Garagalpagystanyň paýtagtynda dawalar başlandy. Konstitusiýadaky göz öňünde tutulýan üýtgetmeleriň biri hem Esasy Kanundan Garagalpagystanyň özbaşdaklygy hakynda Düzgünnamany we onuň halkynyň ählihalk sala salşygyny geçirmek netijesinde ýurtdan bölünip aýrylmaga hukugyny aýyrmaklygy göz öňünde tutýardy.
Dawalar başlanandan soň, Özbegistanyň Prezidenti Nukus şäherine geldi we bu ýerde Respublikanyň awtonomlygyna dahylly ýurduň Konstitusiýasynyň üýtgedilmejekdigini aýtdy.
Dawalar netijesinde, azyndan, 18 adam aradan çykdy, 243-si ýaralandy diýip, Özbegistanyň Baş prokuraturasynyň wekili Abror Mamatow habar berdi.
