Biologiýa we lukmançylyk ugrundan abraýly ylmy neşirleriň biri bolan Britaniýanyň “The Lancet” žurnalynda çap edilen täze gözlege laýyklykda, dünýä ilatynyň sanjym almagy 2020-nji ýylyň dekabr aýyndan 2021-nji ýylyň dekabr aýy aralygynda COVID-den tas 20 mln ölümiň öňüni aldy. Bu barada interfax.ru habar berýär.
Gözlegçiler matematiki modelirlemäniň esasynda sanjymlaryň tutuş dünýäde ölümiň potensial sanyny iki esse azaldýandygy baradaky netijä geldiler. Hünärmenleriň hasaplamalaryna görä, sanjym edilmezden dünýäde koronawirus keselinden 31,4 mln adam ýogalardy.
Resminamada sanjymlaryň uly täsiri we millionlarça adam janynyň sanjymyň ilkinji ýylynda halas edilen bolmagynyň ähtimaldygy aýdylýar.
Jons Hopkins amerikan uniwersitetiniň maglumatlary boýunça, anna güni sagat 08:00-a çenli ýagdaýa görä, pandemiýa başlany bäri tutuş dünýäde koronawirus ýokanjyna garşy dürli sanjymlaryň 11,6 mlrd dozasy sanjyldy, COVID sebäpli 6,3 mln adam ýogaldy.
