24-nji iýunda geçirilen Hökümet mejlisinde Ministrler Kabinetiniň Başlygynyň оrunbasary M.Mämmedowa şu ýylyň iýul aýynda geçiriljek esasy çäreleriň tertibi barada hasabat berdi. Şol çäreler maslahatlary, döredijilik duşuşyklaryny, onlaýn çäreleri, sergileri hem-de şanly senelere bagyşlanan wagyz-nesihat çärelerini özünde jemleýär.
Aýdymçy ýaşlaryň arasynda geçirilýän “Ýaňlan, Diýarym!” telebäsleşiginiň welaýatlar boýunça jemleýji tapgyrlaryny we dutarçy bagşy-sazandalaryň arasynda yglan edilen “Çalsana, bagşy!” bäsleşiginiň welaýatlar boýunça tapgyrlaryny geçirmek göz öňünde tutulýar. 2024-nji ýylda Fransiýada türkmen sungatyna we taryhyna degişli sergini geçirmegiň guramaçylyk meselelerini ara alyp maslahatlaşmak boýunça şu ýylyň 7-nji iýulynda sanly ulgam arkaly ikitaraplaýyn duşuşygyň geçirilmegi meýilleşdirilýär. Wise-premýer Gurban baýramy mynasybetli Aşgabat şäherinde hem-de ýurdumyzyň welaýatlarynda dürli medeni çäreleriň geçiriljekdigini habar berdi. Geljek aýda geçirilmegi meýilleşdirilen çäreleriň meýilnamasy döwlet Baştutanynyň garamagyna hödürlenildi.
Döwlet Baştutany hödürlenen meýilnamany makullap, wise-premýere degişli tabşyryklary berdi.
