Ferrari kompaniýasy öz Fiorano trassasynda kompaniýanyň 75-ýyllygy mynasybetli guran yşyk şüweleňiniň ýazgysynyň wideoroligini çap etdi. Çapyşyk ýoluny uzaboýuna trassa boýunça hereket edýän superkary şekillendirýän yşyk diodlary bilen örtdüler. Şüweleňiň gerimi şeýlebir giň boldy welin, çäre Ginnesiň rekordlar kitabyna düşdi.
«Müňlerçe yşyk diodlarynyň ýagtylygy çapyşyk meýdançasyny biziň esaslandyryjymyz Enso Ferrara, şeýle hem onuň bize goýup giden ruhuna we yhlasyna bagyşlanan şekiller bilen bezelen Yşyk Diwaryna öwürdi» — kompaniýa wakany şeýle beýan etdi. Hakykatdanam yşykdan surat eserini döretmek üçin ulanylan diodlaryň sany milliondan geçdi.
Şüweleňde 1 039 280 yşyk diodyny emele getiren 172 müň lampa ulanyldy. Olaryň hatar guran «setirleriniň» umumy uzynlygy 89 kilometr boldy, yşyk bilen örtülen meýdança bolsa 113 müň inedördül metre sähelçe ýetenok. Munuň özi Ferrari-niň yşyk diodlary bilen yşyklandyrylan dünýäde iň uly çapyşyk trassasyny dörediji hökmünde rekordlar kitabyna girmegi üçin ýeterlik boldy.
Şonda çapyşyk ýolunyň yşygy diňe bir Ferrari Daytona SP3 superkarynyň hereketini yzarlaýan dinamiki däl, eýsem animasion hem işleýär: yşyk diodlary dürli suratlary yzygiderli şekillendirýär. Ahyrda olar Ferrari-niň ýubileýiň şanyna işlenip taýýarlanan we geçen ýylyň dekabr aýynda hödürlenen baýramçylyk logotipi bilen goşulyşyp gidýär.
