Angliýadan bäş ýaşly gyzjagaz kitap ýazyp, Ginnesiň rekordlar kitabyna girdi. Kitabyň bezegini hem onuň özi ýerine ýetirdi diýip, UPI agentligi habar berýär. Muny gazeta.ru ýetirýär.
Bella Jeý Dark resmi taýdan dünýäde iň ýaş ýazyjy bolup, rekord goýdy. Onuň “Azaşan pişik” kitaby 1000-den gowrak nusga bilen ýaýrady. Eseriň nusgasynyň ýaýradylmagyna kömek eden ejesi Çelsi gyzyna örän buýsanýandygyny aýdýar.
“Azaşan pişik” – bu köçede azaşyp, nätanyş ýerlerde ejesiz aýlanmaly däldigine düşünen pişik baradaky hekaýadyr. Çelsi bu hekaýa kiçijik çagalar üçin öwrediji bolar diýip hasaplaýar.
“Ol [Bella] bir suratdan başga ähli suratlary özi çekdi” – diýip, Çelsi aýdýar.
Gyzyň ejesi Bellanyň ýazyjylyk zehinini ösdürjekdigine we “Azaşan pişigiň” dowamyny ýazjakdygyna ynanýar.
