Apple korporasiýasy smartfonlaryny özbaşdak bejermek üçin serwisi işe girizýändigi barada habar berdi. Ol ABŞ-daky ulanyjylar üçin elýeterli bolar. Bu barada kompaniýanyň saýtynda ýerleşdirilen metbugat relizinde aýdylýar.
Reliziň maglumatlaryna görä, täze internet dükan alyjylara 200-den gowrak original ätiýaçlyk böleklerini we gurallary hödürlär, bu bolsa ulanyjylara iPhone 12-ni we iPhone 13-i, şeýle-de iPhone SE-ni (3-nji nesil) abatlamaga, şol sanda gurluşyň displeýini, akkumulýatoryny we kamerasyny çalyşmaga mümkinçilik berer. Şu ýylyň ahyrynda bu programma Mac kompýuterlerini bejermek üçin gollanmalar, bölekler we esbaplar goşular.
Apple goşmaça Birleşen Ştatlardaky ulanyjylara bir gezeklik abatlaýyş üçin satyn almak islemeseler, gurallar toplumyny bir hepdelik kärendesine almaga mümkinçilik berer. Kompaniýa “elektron gurluşlaryny bejermekde tejribesi bolmadyk müşderileriň köpüsi üçin Apple-iň original böleklerini ulanýan sertifikatly hünärmenler bilen professional hyzmat üpjün edijisine barmagyň hyzmaty almagyň howpsuz we ygtybarly usulydygyny” belledi.
Şeýle-de, kompaniýanyň saýtynda şeýle serwisiň şu ýyl Ýewropadaky ýaşaýjylar üçin hem elýeterli boljakdygy aýdylýar.
