18-nji aprelde Prezident Serdar Berdimuhamedow kakasy Gurbanguly Berdimuhamedow bilen bilelikde Hezreti Omar metjidinde atasy Mälikguly aganyň belli güni mynasybetli sadaka berdi. Bu ýerde ýurdumyzyň müftüsi Mälikguly aganyň jaýynyň jennet, ruhunyň şat bolmagyny dileg edip, aýat okady.
Soňra metjitde Prezident Serdar Berdimuhamedow kakasy Gurbanguly Berdimuhamedow Türkmenistanyň müftüsi bilen gürrüňdeş bolup, ýurdumyzyň hormatly ýaşulularynyň asyrlar aşyp gelýän nusgalyk ýörelgeleriniň häzirki zamanyň ruhuna kybap derejede dowam etmelidigini, olaryň ösüp gelýän ýaş nesilleri watansöýüjilik ruhunda terbiýelemek meselelerine zerur üns bermelidiklerini belledi.
Metjidiň sadaka bermek üçin niýetlenen binasynda hormatly Prezident atasy Mälikguly Berdimuhamet oglunyň belli gününiň sadakasyny berýändigini, bu senäniň mukaddes Remezan aýyna gabat gelendigini nygtady we hormatlap gelendikleri üçin sadaka gatnaşýanlaryň ählisine taňryýalkasyn aýtdy. Türkmenistanyň müftüsi merhumyň ruhuna bagyşlanyp berilýän sadakanyň hormatyna tebärek çykdy. Soňra agzaçar wagtynyň gelmegi bilen, sadaka gatnaşyjylara nahar çekildi.
