Gartner analitikleri global ýarym geçiriji pudagynyň 2021-nji ýyldaky maliýe netijeleri barada hasabaty neşir etdiler. Bazara gatnaşyjylaryň umumy girdejisi bir ýylda 26,3% ýokarlanyp, 595 mlrd dollara ýetdi. Global çip ýetmezçiligi, 5G smartfonlarynyň sanynyň artmagy hem-de çig malyň we logistika hyzmatlarynyň gymmatlamagy ýarym geçiriji önümleriň ortaça satuw bahasynyň ýokarlanmagyna sebäp bolup, girdejiniň artmagyny üpjün etdi. 2018-nji ýyldan bäri ilkinji gezek Samsung Electronics kompaniýasyna Intel-den birinji orny almak başartdy. Koreýanyň öndürijisi görkezijini 28% gowulandyrdy, emma amerikan ägirdiniň girdejisi geçen ýyl 0,3% azaldy. Öndürijileriň ilkinji onlugyndan ýylyň jemi boýunça iň gowy ösüşi AMD bilen MediaTek görkezdi. Olaryň girdejisi degişlilikde 68,6% we 60,2% ýokarlandy.
Has ähmiýetli, ýöne oňyn däl dinamikany HiSilicon görkezdi. Onuň girdejisi 81%, ýagny 2020-nji ýyldaky 8,2 mlrd dollardan 2021-nji ýylda 1,5 mlrd dollara çenli azaldy. Netijede, ol top-25-den çykdy. Bu görkeziji kompaniýa eýeçilik edýän Huawei garşy amerikan sanksiýalarynyň netijesi boldy. HiSilicon-yň yzy bilen Hytaýyň global ýarym geçirijiler bazaryndaky paýy 2020-nji ýyldaky 6,7%-den 2021-nji ýylda 6,5%-e çenli azaldy. Günorta Koreýa bolsa geçen ýyl özüniň global bazardaky paýyny 19,3% ýokarlandyrdy..
Ähli pudagyň esasy ösüş hereketlendirijisi pandemiýa sebäpli gowşan 2020-nji ýyldan soň güýçli oňyn dinamikany görkezen awtomobil we senagat komponentleriniň bazary boldy. Awtomobil bölekleriniň bazary 34,9% ýokarlandy. Dinamika boýunça ikinji orny 24,6% ýokarlanan simsiz aragatnaşyk bazary eýeleýär: eger 2020-nji ýylda 251 mln 5G smartfony çykarylan bolsa, 2021-nji ýylda olaryň sany 556 mln boldy.
Global bazaryň ösüşiniň ýene bir şerti ýadyň önümçiligi boldy, bu segment ýarym geçirijileriň satuwynyň 27,9%-ini üpjün edip, girdejini 33,2% ýokarlandyrdy. Bu ýerde personal kompýuterlere we ultramobil gurluşlaryna hem-de bulut üpjün edijileriniň enjamlary üçin böleklere islegi ýokarlandyran uzak aralykdan iş, şeýle-de iş bilen okuwyň gibrid görnüşi kesgitleýji tendensiýa boldy.
