Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow Türki Döwletleriň Guramasynyň Ýaşulular geňeşiniň agzalygyna saýlandy. Bu barada guramanyň www.turkkon.org saýtynda habar berildi.
Habarda Gurbanguly Berdimuhamedowyň Türki Döwletleriň Guramasynyň Ýaşulular geňeşine kabul edilmeginiň guramanyň işini öňe ilerletmäge ýardam berjekdigi nygtalýar. Hususan-da: «Sekretariat Gurbanguly Berdimuhamedowyň Ýaşulular geňeşine agzalyga saýlanmagyna buýsanýar we onuň pähim-parasadynyň, tejribesiniň hem-de bilimleriniň geňeşiň mümkinçiliklerini baýlaşdyrjakdygyna, guramanyň abraýyny ýokarlandyrmakda möhüm orun eýelejekdigine ynanýar» diýlip, guramanyň habarynda bellenilýär.
Ýeri gelende bellesek, şu ýylyň 25-nji martynda Türkmenistanyň Milli Geňeşiniň Halk Maslahatynyň Başlygy, Hormatly il ýaşulusy Gurbanguly Berdimuhamedow Türki Döwletleriň Guramasynyň Ýaşulular geňeşiniň başlygy Binali Ýyldyrymy kabul edip, duşuşykda Türkmenistanyň bu guramanyň alyp barýan işlerine, şol sanda Ýaşulular geňeşine işjeň we netijeli gatnaşmagyny möhüm ugur hökmünde kesgitländigini nygtady.
