Amerikaly işewür Ilon Mask ABŞ-yň Gymmatly kagyzlar we biržalar boýunça komissiýasynyň saýtynda çap bolan resminamadan görnüşine görä, Twitteriň ähli paýnamalaryny satyn almagy teklip etdi.
Mask 41,39 mlrd dollar bahany ýa-da her paýnamany 54,20 dollardan satmaklaryny teklip etdi.
Işewür ozal Twitteriň bir bölegini satyn alypdy, sebäbi onuň «tutuş dünýäde söz azatlygynyň ýörelgelerini berjaý etjek» platforma bolup biljegine ynanýardy. Söz azatlygy diýmek bolsa, onuň sözlerine görä, — bu «demokratiýanyň ýöremegi üçin jemgyýetçilik zerurlygy».
«Emma, kompaniýa maýa goýmak bilen, men onuň häzirki bolşunda gülläp ösmejegine-de, bu jemgyýetçilik zerurlygyna hyzmat edip bilmejegine-de düşündim. Twitteri hususy kompaniýa öwürmeli. Şonuň üçinem, Twitteri 100% satmaklaryny teklip edýärin» diýip, Maskyň resminamada getirilýän beýannamasynda aýdylýar.
Işewür öz teklibine «ýerine düşen» teklip diýip, onuň gutarnyklydygyny belledi. Eger ol kabul edilmese, «paýdar hökmünde öz nukdaýnazaryna täzeden seretjekdigine» söz berdi.
«Twitteriň juda uly kuwwaty bar. Men ony açaryn» diýip, Mask sözüni jemledi.
Onuň Twitteri satmaklary barada eden teklibinden soň, 14-nji aprelde Nýu-Ýorkuň gazna biržasynda geçen deslapky söwdalaşyklarda kompaniýanyň paýnamalary 18%, her kagyzyna 53,88 dollara çenli göterildi.
