Günorta Koreýanyň Samsung Electronics kompaniýasy şu ýylyň birinji çärýeginde operasion girdejisiniň geçen ýylyň degişli döwri bilen deňeşdirilende 50,3% ýokarlanjakdygyny çaklaýar. Şeýle maglumatlar kompaniýanyň saýtynda ýerleşdirilen çykdajylar we girdejiler baradaky deslapky hasabatda saklanýar diýip, TASS habar berýär.
Onuň maglumatlaryna görä, 2022-nji ýylyň ilkinji üç aýynda jemi operasion girdeji, takmynan, 11,5 mlrd dollara (14,1 trln wona) barabar boldy. 2021-nji ýylyň birinji çärýeginde bu görkeziji 7,6 mlrd dollar (9,38 trln wona) bolupdy. 2022-nji ýylda operasion girdeji hünärmenleriň çak edişinden köp boldy diýip, Yonhap agentligi belleýär.
Jemi satuw möçberi, takmynan, 63,1 mlrd dollar (77 trln wona) boldy. Eger görkezijiler ahyrky hasabatda tassyklansa, bu birinji çärýekde satuwlaryň arasynda rekord bolar. Yonhap agentliginiň belleýşi ýaly, ýylyň ilkinji üç aýyndaky oňyn görkezijiler mikroçiplere we smartfonlara bolan ýokary isleg bilen baglanyşyklydyr. Hünärmenler satuwyň we operasion girdejiniň soňky hasabat döwürlerinde hem ýokarlanmagyna garaşýarlar.
