Kosta-Rikada geçen prezident saýlawlarynyň býulletenleriniň 95,93%-i saýhallanandan soňky netije boýunça ozalky maliýe ministri Rodrigo Çawes ýeňiş gazandy. Ol saýlawçylaryň 52,86% sesini aldy diýip, TeleSur teleýaýlymy habar berýär. Ikinji tapgyrda oňa öňki prezident Hose Mariýa Figeresden öňe geçmek başartdy.
Rodrigo Çawes 2019-2020 ýyllar aralygynda maliýe ministriniň wezipesini eýeledi. Ol Sosial-demokratik ösüşiň sagçysentristik partiýasyndan dalaşgärlige hödürlenipdi.
Hose Mariýa Figeres 1994-1998 ýyllarda ýurda baştutanlyk edipdi, ol Milli azat edişiň sentristik partiýasyndan hödürlenipdi. Birinji tapgyrda olar degişlilikde 16,78% we 27,28% ses gazandylar.
Ikinji tapgyrda ses bermek 3-nji aprelde geçdi. Deslapky maglumatlara görä, saýlawa saýlawçylaryň 57,33%-i geldi. Saýlawlaryň ýeňijisi öz wezipesine dört ýyllyk möhlet bilen (2022-2026) 8-nji maýda girişer. Jenap Figeres saýlawlarda öz ýeňlişini boýun aldy we bäsdeşini ýeňşi bilen gutlady.
Kosta-Rikanyň häzirki prezidenti Karlos Alwarado eýýäm saýlanan prezidente öz gutlagyny ýetirdi. Rodrigo Çawesiň wezipä girişmek dabarasyny 8-nji maýda geçirmek bellendi.
