Amsterdamyň Erkin uniwersitetiniň alymlary ilkinji gezek adam ganynyň mikroplastika bilen hapalanmasyny ýüze çykardylar. Bu açyş bölejikleriň tutuş beden boýunça hereket edip, organlarda ornaşyp biljekdigini görkezýär diýip, Day.Az belleýär.
Derňew geçirijiler 22 sany näbelli donoryň gan nusgalaryny seljerdiler we olaryň 17-sinde ululygy 0,0007 mm çenli bolan plastik bölejiklerini tapdylar. Nusgalaryň ýarysynyň düzüminde adatça içgiler üçin çüýşelerde ulanylýan PET-plastigi, olaryň üçden birinde bolsa önümleri gaplamakda ulanylýan polistirol tapyldy. Gan nusgalarynyň dörtden biri plastik paketleri taýýarlamakda ulanylýan polietileni saklaýardy. Käbirinde bolsa plastigiň iki ýa-da üç görnüşi bar.
“Biziň gözleglerimiz ganymyzda polimer bölejikleriniň bardygyna ilkinji subutnamadyr – bu öňegidişlik netijesi. Şeýle-de bolsa, biz derňewimiziň çägini giňeltmeli we nusgalaryň ölçegini, baha berilýän polimerleriň sanyny artdyrmaly” – diýip, ekotoksikolog Dik Wetkah aýtdy. Goşmaça gözlegler eýýäm dowam etdirilýär diýip, ol sözüniň üstüni ýetirdi.
