Saud Arabystanynyň Saudi Aramco nebit kompaniýasynyň 2021-nji ýylda arassa girdejisi halkara maliýe hasabatynyň ülňüleri boýunça, ondan öňki ýyl bilen deňeşdirilende 124% ýokarlanyp, 110 mlrd dollara ýetdi. Bu barada kompaniýanyň beýannamasynda aýdylýar diýip, TASS habar berýär.
2021-nji ýylyň jemi boýunça operasion işden alnan arassa pul serişdesi bir ýyl ozalky 76,1 mlrd dollar bilen deňeşdirilende 139,4 mlrd dollar boldy. Erkin pul akymy 2020-nji ýyldaky 49,1 mlrd dollar bilen deňeşdirilende 107,5 mlrd dollar boldy. Saudi Aramco-nyň 2021-nji ýylyň 31-nji dekabryna çenli karz koeffisiýenti 14,2% boldy (2020-nji ýylyň ahyrynda 23%).
Şeýle-de, kompaniýa 2021-nji ýylyň dördünji çärýegi üçin paýdarlara 18,8 mlrd dollar möçberinde diwidend tölemek barada yglan etdi.
Saudi Aramco-nyň beýannamasynda kompaniýanyň 2027-nji ýyla çenli nebit önümçiligini bir günde 13 mln barrele çenli ýokarlandyrmagy meýilleşdirýändigi, şeýle-de 2030-njy ýyla çenli tebigy gazyň önümçiligini 50% ýokarlandyrmak mümkinçiligini göz öňünde tutýandygy aýdylýar. Mundan başga-da, Saudi Aramco wodorod önümçiligini ösdürmegi we gaýtadan dikeldilýän energiýa çeşmelerine maýa goýmagy maksat edinýär.
Saudi Aramco-nyň baş müdiri Amin Nasser kompaniýanyň maliýe netijelerine ýokary baha berdi. “2021-nji ýyl COVID-19 pandemiýasy sebäpli tutuş dünýäniň başdan geçiren kynçylyklaryna we agyr şertlerine garamazdan, Saudi Aramco üçin maliýe we operasion netijeleri, başlangyçlar, gazanylan üstünlikler we geljek üçin maýa goýumlar nukdaýnazaryndan örän ähmiýetli boldy” – diýip, ol belledi.
