Ýekşenbe güni Eýranda ýerli Gün senenamasy boýunça täze ýyl (Nowruz) başlady. Bu barada TASS habar berýär.
Eýran senenamasyna görä, 20-nji mart bilen gabat gelýän Esfand aýynyň 30-y ýylyň soňky güni bolup durýar. Ýöne Nowruzyň gelmegi astronomiki gözegçilikleriň esasynda sekuntyna çenli takyk hasaplanýar we ol täze Gün sikliniň başlanmagyna gabat gelýär. Şeýlelikde, bu ýyl Nowruz 20-nji martda 19 sagat 03 minut 26 sekuntda geldi. Bu fakt eýranlylara olaryň täze ýylynyň dünýäde iň takykdygyny öňe sürmäge mümkinçilik berýär.
Bu günler Eýranyň ýaşaýjylary şäherleriň köçelerini bezeýärler. Tähranda baýramçylykdan birnäçe gün öň hasyllylygyň we täze durmuşyň başlanmagynyň adaty nyşany bolan uly bezelen ýumurtgalar peýda boldy. Mundan başga-da, şäherleriň köçelerinde baharyň we täze ýylyň habarçysy Hajy Firuzyň eşigini geýen adamlara duşmak bolýar. Ol gyzyl eşikde bolup, onuň ýüzi düýt bilen ýapylandyr.
Adaty bezegler eýranlylaryň öýlerinde hem peýda bolýar. Esasy nyşan baýramçylyk stoly “haft sin” hasaplanýar. Ol, adatça, sarymsak, alma, sirke, sumah, teňňe, bugdaý maýsalary we semene bilen bezelýär.
Bu gün eýranly syýasatçylar we jemgyýetçilik işgärleri ýurduň ýaşaýjylaryny baýramçylyk bilen gutlaýarlar.
